Iffgh d gh usiru n tzazwlt n sidi mumn gh tgmmi tumlilt ussan ad ggwranin yan uḍris amaynu n ultma tngh massa khadija Abenrousse mi tsti s ism: "imnghi amggaru" ( Le dernier combat ).Adlis ad amaynu n massa khadija Abenrousse tsmun gis kra n umiyn d tullisin zg taskla tamaḍlant tsughl tn s tmazight tfk asn yan udm yaḍn s uskkil d tguriwin ngh iẓiln s yat tgharast bahra idusn immimn gnt gis tullisin ad kkuẓt tsmun tnt gh 120 n tasna s sin iskkiln win tfinagh d ulatin, ig usktur ns mkad :
Tafalkayt n uglmim
Imnghi amggaru
Agldun Anir
Tagat n tggurḍi
Iffgh d udlis ad s yan udm iẓiln ittawin tiṭṭ, tsti as massa Abenrousse ism n yat gh tullisin ad ig ism ns, yack d gh tzwart lli as tskr massa εaziza Nafiε :
"Ultma tngh Xadija Abnrus tga yat tawtmt yusin anzgum n tutlayt tamazight, ur ar d teṭṭay adlis ar d yad gis mmghint tinitin n udlis yaḍn, ur ar tmggr yan warra ar d tkrz i wayyaḍ.
Hatt id dagh ar tsfrujju igr n tskla tamazight s warra-ad ns amaynu, mi tsti ism n: "imnghi amggaru" lligh tsmun kra n tjddigin n tskla tamaḍlant trur tnt s tmazight ad gnt isni f ixf n tskla ngh d wawal ngh.
Arra-ad tiwi d gis kra n umiyn d kra n tullisin lli d iswan gh taysi n ufgan asint atign fulkinin lli tra ad tn tzzri i imghran imqrann ula imẓyann zund atig n tayri n tmazirt d tgwmat d twizi d wiyyaḍ…
Iḍrisn n massa xadija ar sslmadn tutlayt izdgn immimn mklli agh mmalan abrid inmn yughdn, mln agh agharas ifrghn ittawin s gar tagara zund abrid n tggurḍi d udurdu".
Adlis n tmarat ngh iga wis kraḍ ns, ḍarat n mad yad tssufgh adlis ns izwarn "illis n waman" gh usggwas n 2007 lli yiwin tasmghurt n ircam, d mm iẓula gh 2009.
Adlis ad iga mad yaqqra wazzan ula amqran, acku tagharast lli s ittyura d tutlayt ns izdgn ifssusn tga ma gh ittlmad wanna iran ad yara d ad issaghul taskla tamaḍlant s tmazight.
Tura-t : Massa εaziza Nafiε Aza
Taghbalut : amaynu.net
Aucun commentaire:
Enregistrer un commentaire