Titbirin
Ayelnt titbirin s igenwan
Ayelnt titbirin s igenwan
Aḍunt-d, sersent tiḍarin f usulil a-en
Ar issutur yan ad sers nt isawal
Inin as nt
Azul a ti-d agh yukern ul
Azul n tayri gitengh isserghan takat
Ig w-ul negh inkan, aywa ma-d tennamt
Gigh-en afus ad agwmegh tayri s w-uraw
Igh ukan lkemn imi, tffertel ger iḍudan
Tasa trufa, tra tissi inghan irafan
Aman, tiguriwin nwent ad tnt igan
Ul igellin isellaw
Ar ittwarga s isura n tayri
Ad gisen ssan, uten s iẓuran
Zugen gh igran d w-urtan
Ajjig izuẓden tafukt gh w-ussan semmiḍnin ad gan
Tuga ikermn iran tuksi1 d uzwu irghan
A titbirin, is tramt ad neg asmun n tudert
Imiri ur tessiḥel temmara mqar teggut
Ahiyyaḍ ittghawalen aḥwac mqar yaggug
Imaran imazighen skern akkw tagelmimt s imeṭṭawen
Sul ukan llan-t, gin-t anmirag2 n imaghzalen3
Gin-t ula asanzal4 n imallayen
Ad ẓrin timitar n tayri
Dar ayt tmazgha d timmuzgha
Fken tugga
F ma-d issunf umezruy ad-t ur yara
Amawal :
1- Tuksi : chaleur
2- Anmirag : point de rencontre
3-Iimaghzalen : amoureux
4- Asanzal : lieu de pélrinage
Amasine
Agadir, ass : 15/01/97
-----------------------------------------------------------------------------------------------
Imal
Ajjig Amazigh
Ajjig nem a tamazight
Ass : 25,27,30/10/2010
-----------------------------------------------------------------------------------------------
Dadda Amazigh
Dadda amazigh
Azenẓar n unaruz
Ur-d anzig, negh d azag
Ur-d afa n udrar
As ra-d rwelgh a tikeṣṣad
Ur ugadegh tikeṣṣad
Ur kṣudegh imal
Tillas mqar gguten-t
Ad anfen-t ukan
Azenẓar ad-d ighwli
Mqar, mqar
Mqar inbbeḍ uzeḍḍum
Mqar tella telkkawet
Mqar gan imeksawen uccanen
Mqar telluẓa tyessa
Azenẓar ra-d igemḍ
Azenẓar ra-d ilal
Ra-d ifaw lḥal
Ra-d iḍessa w-azzan
Yummer baba-s
-----------------------------------------------------------------------------------------------
Imal
Azal inu a y immi ḍernt gis tillas
Mqar-d akk° ur igh°li w-ayyur fellas
Ula tella tazughi n taruḥi n tafukt n w-ass
Itran urta llan ula ran
Tafukt gh igenna, izenẓaren rẓan
Ur-d lkemn akal, ur as ufan
Tillas, tagut n taylgi n w-ussan
Amnid n yan ur t ḍufen, ula llan sern iberdan
Afgan bukḍen, agharas jlan
Tifawin, isufa da y ittghawal yan
Igh en luḥ-en aḍar luḥent-en mraw
Izakaren s tettegal tudert n mennaw
Isafaren i tiggas lli luḥent tikeṣṣad gh w-ulawen
Gin-t amarur da y itwattas biyrafan
Mac, manza aman ?
Manza tasa yummern ad temḍi taḍfi n w-ussan
Manza anelli isunfan ad luḥen anezgum
Ddern ussan mek lli gan
Zzrin tudert, mḍin tamimt n w-awal
A y afgan igellin
Tellit gh inaghan imeghlal d w-ussan f imal
Imal a y imal, a war udem
Ma-d teḥḍit gh usekka n yan ?
Tgit tiffilla neg ineg°maren
Aqq, tgit tamdayt
Neg isek°ran d iwetlan
Amasine
Agadir, aseggwas n : 98/99
-----------------------------------------------------------------------------------------------
-----------------------------------------------------------------------------------------------
Ajjig Amazigh
Ajjig nem a tamazight
Agh usigh amud
K°fsen-t imezwura negh
Gh turtit nem a tamazgha
Bughlan, zujjgen
Fkan tujjutin i wi-aḍ
Ajjig nem a tamazight
Agh usigh amud
Kḍugh tujjut n tumert
Ẓergh afulki n tudert
Mqar-d tekka tmurghi
Iẓelmed d iminig
Mqar sghern ussan ighbula
Ajjig nem a tamazight
Fkan amud
Iḥḍat w-akal n tmazirt inu
G°deln-t, f gar afus
Ad t ur slin
Yawi-d umedlu
Anẓar n tilelli d ufrak
Isu w-amud aman n tilila
Mḍeln irafan, ddern
Ilal-d ujjig nem a tamazight
Isenduhdu akal
Yall ixef, yut s iẓuran
Isummer tafukt n imal
Ajjig nem a tamazight
Agh usigh amud
Ḥḍugh-t gh igudar, nḍuf-t
Nfek tisura nes i w-arraw inew
Inigh as :
Amud n tmazight ad sar t ur tejlum
Lan atig war anaw
Ayda n baba-k d ma-k, ad gan
Iga tabrat nek
Gan addur nek
Iga ass nek
D usekka nek
Gan tudert nek
D imal n w-arraw nek
-----------------------------------------------------------------------------------------------
Dadda Amazigh
Dadda amazigh
Mqar-k ur ẓrigh
Righ ad ak inigh
Max, tejlit akal ?
Tget afus gh ufus
N garafgan
Tasset ixef nek s izakaren
Asafu, usin-t gar ifasen
Tget asen amawas
Tget isek°fal
Ar ser-k lkkemn, awettas
Win-sen, ur-d win-k
Ad gan
Dadda amazigh
Mqar-k ur ẓrigh
Righ ad ak inigh
Max, tejlit awal ?
Tkerft iles nek
Tget as, tigusin n usged
Terbut awal n wi-yaḍ
Tget i bab nsen isemg
Ar asen tinit
Gan ag°erram
Ar asen tkkerzet
Igran n w-awal
Yasi tayafut
Tasit tammara
Tfelt igran nek
Ar ten sgharen ussan
Ksen g-isen uccanen
Dadda amazigh
Tusset ixef nek s izakaren
Arun izakaren
Tarwa d w-ayyawen
Irin ad agh kerfen
Gin agh taglult
Ad nut tazzgunt
Gh tillas n tuttut
Uhu, a dadda amazigh
Uhu nit iquren
Ad ak t inigh
Abrid nek
Ad d-is bbigh
Nekk, ra-d bbigh izakaren
Utegh s ifaren n tilelli
Utegh s umadir d usemmawed
Kerzegh, igran n w-awal nek
S w-awullu n tirra
Gzigh iḍerfan
S tg°ersa n usekkil
Zzrigh ser-sen
Isura n tussna
Fergegh ten s izerfan
G°delgh ten f imakern
D imezzan
Dadda amazigh
Nekk, ayyaw nek
Kkusigh akal nek
Kkusigh awal nek
Neg, bab nes
Dadda amazigh
Nekk, ur sul righ tag°mat n wi-yaḍ
Righ tinew
Nekk, ur sul righ awal n wi-yaḍ
Righ winew
Ur sul righ tafukt n iminig
Nekk, righ tin dar negh
Ur sul righ, tassast n izakaren
D tabbayt n iẓuran
Nekk, righ izenẓaren n tilelli
Isufa n timmuzgha d ufrak
Ad nghegh tillas n tinnuzgha
Bbigh izakaren n tissumga
Ass: 08/11/2010
-----------------------------------------------------------------------------------------------Azenẓar n unaruz
Ad-d ighwli uzenẓar, ireẓ tillas
Ifaw lḥal, tanef tallest
Zrin w-aman gh tergwa
Gwmern-t tizzwa
Fsun ujjigen gh igran
Sjujjun urtan
Ilin-t w-ulli gh iseksa d imadaghen gh unrar
Ifaw lḥal, tanef tallest
Zrin w-aman gh tergwa
Gwmern-t tizzwa
Fsun ujjigen gh igran
Sjujjun urtan
Ilin-t w-ulli gh iseksa d imadaghen gh unrar
Ur-d anzig, negh d azag
Ur-d afa n udrar
As ra-d rwelgh a tikeṣṣad
Mac, inaghan imeghlal ad-d iqanen ukan
Ur ugadegh tikeṣṣad
Ur kṣudegh imal
Tillas mqar gguten-t
Ad anfen-t ukan
Azenẓar ad-d ighwli
Mqar, mqar
Mqar inbbeḍ uzeḍḍum
Mqar tella telkkawet
Mqar gan imeksawen uccanen
Mqar telluẓa tyessa
Azenẓar ra-d igemḍ
Azenẓar ra-d ilal
Ra-d ifaw lḥal
Ra-d iḍessa w-azzan
Yummer baba-s
Tummer ma-s
Amasine
Ass: 28/09/02