Abdellah El Manchouri : Imeţţawen n Tamja

Imeţţawen n Tamja

Teftuttusen wussan-inu,
Ţţawen am bumarγud,
Ig iketsi waḍu.
Tfawt tugi ad tessij.
Tağest tarennu.. tarennu..
Tawengint tessara-d amaḍal,
Tufi-t εad isneddu.
Aγi ur dag-s teswi.
Trussi ur dag-s tecci.
Ma dhen yuğeγ yuğeγ yendu.
Yusi-d kid-ek wareq-inek,
Ammi-s n tmurt-inu.
Yebsisseq-ak uγembub,
Arrimet-inek tiru,
Ussan-inek reqḥen,
Tamejjaţ-inek tečirru,
Maca arr-d x useqsi-a:
Swiẓẓeḍ s ufus-inek.
Mmer-ayi mani yeğa
W-areq-inu?

Tukarḍa n Mummu

S uxezzar amezgaru,
Deg waddud-inem aceḍbi.
Tudfed-ayi ur-inu,
Teşşarγeḍ g-s timessi.
Yenna-yi wemnus-inu:
Tamunt-inem akid-i,
Ur yeği wi-t γ-ad yeksen.
X webrid γar taziri,
Ur yeği wi γ-ad yemḥan.
Arriḍa-nni negga,
Γar tiri n uγudani,
Ur yeği wi γ-ad yettun.
Tzağit-nni nezzuğ.
Wami traḥ ad teγri.
Mara yexs-i-cem wur-inu,
Qa d yeği-s n tmurt-inu.
Ur teğid d rbarrani.
Muk-as uεeddu?
A ten d-ayi yenγin!
Muka-s i wemṣewḍi?
Qa nec xayli dewreγ,
Am waẓẓ n wari.
Ad cem sigreγ deg iri.
Ad am sqareqceγ tifednin.
Ad am slulceγ tiḍewḍin,
S rḥenni.
Ad cem ssenyeγ,
X ijj n uyis d azegza.
Ad am εedreγ tnuci.
Ad neεda s rebhut,
Ta ad naweḍ ar reεraṣi.
Ad necḍeḥ gi beneεman,
Recḍiḥ-nni arifi.
Mara nuḥer ad neskuta,
Ad nezzinfa gi tiri n uγudani.
Ad nesqad ijj n uxezzar.
Mummu-nneγ ad yedwer d asari.
Ad ţ-nendi deg waman,
N d-ihegwan x igedman.
Weţţan-d iγubar.
Am remceεceε n tḥenjirin,
Yetraḥ itas-d deg iri.
Igran d izegzawen,
S ireden d imendi.
Teεyarent g-s tisfay,
N reεwin n uεecci.
Tiḥenjirin tefgent-id,
Tawyent-id Buya d asenti.
(...)
Niγ-as i ten,
Mi ked γar-i amuni;
Arr-d mummu-inem.
Mechar γ-ad yekk yendi?
Ini-yi min teẓiḍ?
Seḥḥa-d ssiwer γar-i!
Tennexḍef-d γar-i, tenna-yi:
"Tudart-nneγ teğa,
Tudart-nney teddar.
Tudart-nneγ εad ad tiri.
Mara nexbec tawengint,
Nfewwar aği."