Aselway Obama : Marikan tssen s ubriḥ amaḍlan n igherfan imezwura

   G yan unmuqar asggwsan d imgharen n tqbilin n imadanen imzwura n Marika (indians) g taddart mllulen g Washington, iberrḥ uselway Barack Obama mas rad tssen tawunkt n Marikan s ubriḥ amaḍlan n igherfan (imadanen) imzwura, yackd may ad daṛat ugudi n id bayṭṭar nna tga Marikan iseggwasen ad zrinin af ad ur izri ubriḥ ad g tmttin imunen (United Nations).

   Aselway Obama inna yad g Ibril (April) ad lli izrin mas rad tals taddart mllulen (White house) tighri nes i y-ubriḥ amaḍlan, may ad dat (apres) n w-ayur lli gh tssen Canada s ubriḥ ad, New Zealand nettat tssen s is Ibril lli izrin, Australia aseggwas n 2009.

   Lli gh izzri ugraw amatu n tmttin imunen abriḥ ad aseggwas n 2007, tghama Marikan, Canada, Australia d New Zealand mgal nes. ass a ifka uselway Obama awal nes i imadanen imzwura n Marikan mas rad isker ku ma mu yufa af ad tg Marikan g tmettin lli ibdden d ubriḥ ad ad amẓen imadanen imzwura izerfan nsen.

Yura-t : Lachgar Ḥmad Agwilal

Aghbalu : amaynu.net