Tirẓi n usughl turu tamdyazt !

   Mass Lεarbi Mummuc ittwayssan gh igr n tskla Tamazight s usughl lli gh-d iḍi adlis ns amzwaru “Amnukal mẓẓin” iḍfr t inn “tiguḍiwin n bariz” s “ankaḍ d wallasn yaḍn”, macc amara ngh mass Mummuc irẓa anaw ad n tirra tizi lli gh isti ad yara tamdyazt iml agh mas-d awd ntta iga amdyaz illan gh uswir.

   Tirẓi ad n w-anaw n tirra, zgh asughl ar tamdyazt tbbi abuḍ i yat twckint tamaynut mi nit isti ism n “Tirẓi” tg ilmma adlis ns wis kkuẓ gh igr n tskla Tamazight.

   Adlis ad iffagh-d gh tẓrigin n usinag agldan IRCAM, imun gh 120 n tasna ittyara s uskkil n tfinagh d ulatin, ibḍu f sin igwzman issagh asn: “Adlis amzwaru” d “Adlis wis sin” ilint gis 35 n tmdyazt g-isnt ma-d ighzzifn ula mad igzzuln, ttyarant s tgharast tartart lli ur kkrfn isqquln iqburn.

  
   S umdya yucka-d gh tgzzumt mi ssagh “Tfugla”:

Tiwrrit-d

Imun-d waṭṭar d w-ass

tamẓ trcjt ijddign

rẓmn ifassn I tzzwa

ar tmḥllaln ifrawn

skrn aḥwac d urarn

  
   Tagharast n mass Mummuc tmmim, iwlafn ns aḍfutn ar-d ssan gh tussna tamaḍlant mayann ur-d fllas izza acku asughl zgh tutlayin yaḍnin s tmazight iga nit anzgum ns lli f ibikks tuggas ns afad ad isbughlu igr n tskla Tamazight.

Tura-t : Massa εaziza Nafiε
Aghbalu : http://tirrawal.canalblog.com