Iγbula : Tinnẓmit n tarkyulujit g taγuri d ufran n umezruy Amaziγ

   Isberrek uneγmas εabdennbi Idsalem g usayes adelsan n Tiliẓri Tamaziγt "Iγbula", Akwas (jeudi) 30/12/2010 g 21:45 GMT, Mass Yusef Bukebbuḍ, imerzi (chercheur) g Tarkyulujit. Iẓli Mass Idsalem timlilit n w-ass a-n i : "Tinnẓmit (l’importance) n tarkyulujit g taγuri d ufran n umezruy".  

   G umezwaru, isawel Mass Bukebbuḍ γef tinnẓmit n tarkyulujit g ussefru n umezruy Amaziγ d umezruy n tiffugna s umata. Tarkyulujit, mek inna imerzi Mass Yusef Bukebbuḍ, ar takka tugga tuzmirin (tugga idusen), tesanef tifukal (gar umlan) d tikerkas n taydyulujit d tallasin n idlisen n umezruy ur ilan amer yan uẓur n tidet. Isemd inna ma s-d umlan (inẓaten : preuves) irkyulujiyen kkan-d nnig umlan yaḍen, acku ṣkan tirsal nsen γef usiggel d tirmit tamusnawt, ur-d γef iwennan, umiy d tallasin n imezwura.     

   G uḥric (agezzum) wis sin n "Iγbula", isawel Mass Bukebbuḍ, γef umezruy Amaziγ d man mek as ar tawes tarkyulujit g ussefru nes, d man mek as ar tzuzzur γef idγaren imallasen nes izenẓaren n tifawt d tidet. Isemd unegbi n Mass εabdennbi Idsalem i w-awal, isawel γef tusna n usesfer (tusna tasesfrant : culture médicale) dar imaziγen imezwura, inna ma-s-d inẓaten irkyulujiyen fkan tugga idusen ma-s skern imaziγen imenza timeggit tagezyant (tasekkirt tatersant : opération chirurgicale) 80.000 n useggwas dat n tlalit n εisa (80.000 BC), d ma-s ismun umezruy n imaziγen g twelkt nes uggar n ugendid (agendid : million) n useggwas, ur-d 3000 n useggwas, d ma-s snen imaziγen tayerza d ugrad (agrad : domestication) dat ad ten snen iγerfan (aγerf : peuple) n agarew agerakal (Méditerranée) d iγerfan yaḍen n umaḍal.

   G tagara n tadwilt "Iγbula", isers Mass Bukebbuḍ afus nes γef yat tittert (revendication) seg tittar n umussu amaziγ, tizi g isawel γef w-allas n tirawt (tirra) n umezruy. Inna ma-s iqan-d ad nales i tirawt n umezruy nneγ, ḥuma ad nesanef tikerkas gi-s yuten s iẓuran d ad t nγer s tiṭṭ tanefrant s tiwisi n umlan irkyulujiyen. Ifek amedya n takerkist (mensonge) taxatart da itinin ma-s amezruy n tamurt n Amurakuc (Maroc) iswutta s 12 n tasut (12 siècle). Inna ma-s takerkist a-d terẓa-tt tarkyulujit s inẓaten uzmiren teffeγ turda (doute), acku amezruy n Amurakuc ar iturri s 1800 n useggwas dat n tlalit n εisa (1800 BC) s tugga n tarkyulujit d umlan nes.

   S ma-d iẓlin s usinag anamur n tusniwin n imedraz d taysi (INSAP), isers Mass Bukebbuḍ adaḍ nes γef tamukrist n taseggazt (budget) d-takka tenbaḍt i usinag, inn ma-s tga tamazuẓt d ur izmir usinag ad sers isker tiwuriwin nes. G tagara n w-awal, inna ma-s yuf ad ifeγ usinag n imedraz ddaw umalu n uγlif (aγlif : ministère) n idels, yili ddaw umalu n tesdawit ḥuma ad ifek tayafut taxatart.