Taγssa n Sifaw El Maḥrug tssengi Arsḍ ig ungal irar t Ugram s tmaziγt

   Asuγl s tmaziγt iga yat twwuri ur irxin slawnt akw iγ isti umara aḍris ityaran s tγarast idusn yasin tugt n iswingimn dranin.

   Mqqar mayad ar nn ttafa mass Ṣalh Agram ur t tssihl tmmara n wanaw n idrisn ad mklli t issihl ad iẓer yat twwuri illan gh uswir bahra imqqurn tyara s tutlayt yaḍen, ur tlli s tutlayt n tmaziγt lli nit igan ils n bab ns, slawant akkw igh iga bab n twwuri ad yan umaziγ mqqurn ifkan tudrt ns d uswingm ns ar timqqit igguran γ iman ns I tmaziγt, ig uḍris ns yat tγwyyit d iffaγn g tγlaγalt n usrfufn d tkrrayt n ufgan amaziγ iddrn gh ul n tdiktaturit.

   Mass Ṣalḥ Agram Itri isti ad isuγl adlis n umara amaziγ alibi mass Said Sifaw El Mahroug ilan ism n “Al Qayḥ” lli yura s taεrabt, ifl t id urta d iffγ.

Bab n ungal :

   Ilul γ iγerm n Ugadu γ Libya gh usggwas n 1946, yura tugt n idlisn s tutlayt n tεrabt ig udlis ad yan gisn iγ ur nenna mas d iga udlis ad agrḍ n timaγ ns tizi ann ad yili ufgan amaziγ izrfan nes iffγ tillas n tdiktaturit n unbiḍ lqddafi.

Immut igllin ass n 27/07/1994.

Maf isawal ungal :

   Mklli d yiwi M.Oussous bab n tzwart n udlis ad: izḍar ad isawl f umukris n tmazight d waddad n imaziγn s yan uḍris iddzn s tmatarin, ikturn s udmawn n tussna neγ g umiyn ns d tnfas ns d tmitar ns, ar isawal f yan ufgan ittyagaln g yan udrar, azddar ns ingi gis yan wasif isfln s ursḍ (idammn iwraγn lli d ittffγn γ waggas, le pus s tfransist), afgan ad ijgugln iγ d iḍr rad iddm i wagjiwn n iγucafn.

Amsuγl :

  Ṣalaḥ Agram ilul g Jrada asggwas n 1971, iga yan umazzal amaziγ imqqurn ittawsn kigan I imaratn s tazzliwin ns d tizi ns, ikcm yad abrid ad n tirra mnck ayad, issufγ yad g usggwas n 2009 yan u dlis n usuγl s ism n “nkkwnin ighuyal” igan tullisin lli yura umara aturki amqqran εaziz Nisin.

Adlis gis 128 n tsna, ittyara s uskkil alatin d tfinaγ, iskr as tazwart mass usus, iffγ d γ tzazwlt n Sidi Mumn γ tgmmi tumlilt, tawlaft n waddal ns iskr tt unaẓur imqqurn M. Mellal.

Yiwi d nit daγ Mass Oussous γ tzwart nes f udlis ad: “Tammara lli ikka mass Ṣalḥ afad ad irar aḍris ad s tmazight ur tmeẓẓiy acku gis iswingimn idran d tguriwin immukrsn lli s immaγ mass ad tnt yini s tmaziγt izdgn ifssusn ittakwz kuyan.

  Anaw n twwuri ad rad tssimghur uggug n tmaziγt, rad tsbuγlu igr n wallas, rad tsfrujju asays n tskla neγ afad ad nizḍir ad neg ils neγ d ils n tirra d uswingm”.

Tura-t : Massa εaziza Nafiε

Aγbalu : http://tirrawal.canalblog.com